info@hrinstitute.az
+994 51 588 31 99
Rusel Plaza, Babek avenue 10E, Baku AZ1025.
Women’s Entrepreneurship Summit 2025 19 noyabr tarixində Bakıda, Fairmont Flame Towers-də keçirildi. Azərbaycan HR İnstitutu və Azərbaycanda Qadın Sahibkarlığının İnkişafı Assosiasiyasının (AQSİA) birgə təşkil etdiyi sammit qadın sahibkarları, investorları, dövlət qurumlarının rəsmilərini və innovasiya liderlərini bir araya gətirdi.
Tədbirin açılışında Dövlət Məşğulluq Agentliyinin İdarə Heyətinin sədri Sadiq Əliyev, KOBİA-nın İdarə Heyətinin sədri Orxan Məmmədov, Türkiyə Cumhuriyyətinin Azərbaycandakı səlahiyyətli və fövqəladə səfiri Birol Akgün, Milli Məclisin deputatı Vüqar Bayramov, Azərbaycan HR İnstitutunun təsisçisi və direktoru Emil Hüseynov və şəhid general-mayor Polad Həşimovun həyat yoldaşı Ofelya Salmanova çıxış etdilər. AQSİA-nın İdarə Heyətinin sədri Səkinə Babayeva isə tədbir iştirakçılarına videomüraciət ünvanladı.
Sammit çərçivəsində keçirilən panel müzakirələri qadınların innovasiya ekosistemində yeri, rəqəmsal transformasiya, liderlik, insan kapitalının gələcək trendləri və qlobal biznes mühitində qadın iştirakçılığının artması kimi mövzulara həsr olundu. Fərqli sahələrdən olan spikerlər öz təcrübələrini bölüşərək qadın sahibkarların regional və beynəlxalq biznes xəritəsində artan rolunu xüsusi vurğuladılar.
Tədbirin ən yaddaqalan məqamlarından biri WE Impact Awards 2025 mükafatlarının təqdimatı oldu. Mükafatlar qadın sahibkarlığının inkişafına töhfə verən şəxslərə və təşkilatlara təqdim edilərək, onların yaratdıqları sosial-iqtisadi təsirin əhəmiyyətini bir daha ön plana çıxardı. Bu mərasim sahibkarların uğurlarının tanıdılması ilə yanaşı, həm də qadın liderliyinin cəmiyyətimizdəki möhkəmlənən mövqeyinin simvolu kimi dəyərləndirildi.
Azərbaycan HR İnstitutunun təsisçisi və direktoru Emil Hüseynov sammitin məqsədi və missiyası barədə danışarkən qeyd etdi:
“Bu gün burada 250-dən çox qadın sahibkarı bir araya gətirdik. Məqsədimiz onların biznes ekosistemində daha güclü mövqeyə sahib olması və insan yönümlü idarəetməyə inteqrasiyasını dəstəkləməkdir.”
Onun çıxışı tədbirin mahiyyətini — birliyə, innovasiyaya və qadın sahibkarlığının davamlı inkişafına verilən dəstəyi — tam şəkildə əks etdirdi.
Women’s Entrepreneurship Summit 2025 Azərbaycanda qadın sahibkarlığının inkişafında mühüm dönüş nöqtəsinə çevrildi və yeni əməkdaşlıqlar, tərəfdaşlıqlar üçün geniş imkanlar yaratdı.
Daha ətraflı HRnews.az saytında.
